Djalogu bejn Ġesu’ u Ġuda – Omar Seguna
Ġuda :
Mgħallem, ma nistgħux
naqblu int u jien
Bit-tagħlim tiegħek narak
taħli ż-żmien.
Iddoqq bil-flawt ta’ l-imħabba
fis-skiet
Tipprova tixgħel kull xemgħa
li ntfiet.
Tipprova tgħin lil kull min
jersaq lejk
Jiddispjaċini għaż-żmien li
kont ħdejk.
Nimxi w’rajk bħal fuq taraġ li ma jwassal
għal imkien.
Bħal fi triq li m’ għandha
ebda tmiem.
Ġesu’:
Le Ġuda.
Tużax l-istess armi
tal-ħakkiema pagana
barranin.
Sabiex tirbah lil Erodi
taħseb li trid tkun bħalu.
Għadek ma fhimtx Ġuda
li t-tempju mhux se jibqa’
għal dejjem
u anke dan il-vjaġġ flimkien
għad jasal fit-tmiem
U kollox fid-dinja ser isir
irmed
Sakemm jerġa’ isib il-glorja u
sliem.
Ġuda:
Mgħallem, it-tagħlim tiegħek dwar limħabba, bħal riflessjoni fl-ilma
li tintilef biċ-ċaqliq u tispiċċa
fix-xejn.
L-imħabba hi bħal riflessjoni
f’mera mfarrka
b’kull biċċa turi sitwazzjoni
li ma tfisser xejn.
Ġesu’:
Ġuda, it-tagħlim tiegħi huwa li
tħarsu mir-riflessjoni tal-ilma għall-verita’.
U noħorġu mill-għar kiesaħ u
mudlam.
Ġuda:
Mgħallem,
Kliemek tqil wisq għalija
Ma jinstab fl-ebda ktieb illi
naqra jien.
Rajtek fil-bogħod u nżajt din
il-libsa umli li libbistni int
Irrid il-poter.
Għandna s-saħħa tan-nies.
Ġesu’:
Kultant, Ġuda, jiġri bħal Israelin
li ma ridux iħallu l-art.
Ġuda int ukoll ġrejt wara l-bagħlin
u warrabt lil imgħallem u ħabib.
Ġuda:
Mgħallem kull tant ma nifhmekx
Ma stajtx naqra moħħok linja wara linja.
Il-bibien ta’ qalbi magħluqin
ma jistgħux jinfetħu.
Għalija midfunin it-tamiet għall-ħelsien.
Ma nistax nagħraf il-pjan divin.
Ġesu’:
Ġuda,
jekk
werqa solitarja f’nofs ta’ deżert
tinfired minn qatra xita li tinżel fuqha.
Jekk taqbad vjaġġ
mingħajr destinazzjoni,
Jekk timxi qalb il-folla,
qalb nies li ma jagħrfukx,
f’toroq li ma jwasslu għal imkien,
u s-sema blu titkarrab bl-uġigħ.
Hemm…f’dak il-mument,
Jien se nkun qrib.
sabiex min idejk noħodlok il-ħabel qattiel
u saħansitra jekk tkun mgħarraq fl-ilma
permezz ta’ dak il-ħabel inreġġgħek lura għall-qawmien.
Sabiex t-tnejn kumpass
fuq ir-ramel bħal meta xlew lil Marija ta’ Magdala
inħażżu ċirku ta’ l-imħabba
u jagħmel kemm jagħmel riħ
u jirfsu kemm jirfsu n-nies
Din l-imħabba ma tintemm qatt.
Lill-Marija Addolorata
Rajtek, Marija dik ħarstek imbikkma.
Lil ibnek tawk, bla ħajja mimli dmija.
Suldat li ħadd ma jaf f’deżert mitluf
u taħt in-nar inqatel mingħajr ħtija.
Is-sejf ġo qalbek kif lil ibnek
rajt fuq għuda msallab f’misraħ ġo Tikrit.
O x’weġgħa ħassejt kif ’l uliedek tlift
spiċċaw mirduma minħabba t-taqbid.
Rajtek il-ħabs, issofri lsien in-nies.
Rajtek tolfoq fuq sodda ġol-isptar.
Rajtek minn żewġek maħqura u msawta.
Rajtek sogħbiena bla saqaf bla dar.
Rajtek bid-dmugħ f’għajnejk tħares lejn ibnek
jistenna l-jum li fih dal-vjaġġ jintemm
bħal meta l-purtiera tat-tempju ċċarrtet
biex magħna tkun għalina f’dan il-hemm.
Qawmien peremezz tas-salib
Ix-xemgħa ntfiet, u ċċartet il-purtiera.
Ix-xemx ukoll inħbiet, wara s-salib.
‘Żda kif id-demm Qaddis saqqa lir-ramel
biex moħbi,ħadd aktar ma jista jara
ħlief siġar dgħajfa, bil-għatx, imnixxfin.
Permezz tad-demm qaddis qed jgħixu, jikbru
u jħarsu lejn is-sema, l-ward u s-siġar,
jaraw ix-xemx bħal titbissem mill-ġdid.