Ejja, Spirtu s-Santu
Ejja, Spirtu s-Santu, imla l-qlub tal-fidili tiegħek, u ħeġġeġ fihom in-nar ta’ mħabbtek. Ibgħat l-Ispirtu tiegħek u huma jinħalqu. U inti ġġedded il-wiċċ ta’ l-art.
Nemmen Mulej li Inti mhux biss wrejtna lilek innifsek fil-ħolqien imma sirt parti mill-istorja tal-bniedem. Grazzi Mulej ukoll li wara l-Qawmien tiegħek nistgħu nibqgħu nirċievu l-istess grazzja permezz tas-Sagramenti. Grazzi Spirtu S-Santu għal dan kollu.
Kif jgħidilna il-Katekiżmu tal-Knisja Kattolika (1118) jgħidilna “L-għan tal-missjoni ta’ l-Ispirtu s-Santu f’kull azzjoni liturġika hu li ssejjaħ l-għaqda ma’ Kristu biex jissawwar il-Ġisem tiegħu. l-Ispirtu s-Santu qisu l-qawwa li tagħti l-frott lill-friegħi tad-Dielja tal-Missier”.
San Pawl jikkonferma din l-għaqda li niksbu permezz ta’ l-Ispirtu s-Santu fil-magħmudija;
“Għax aħna wkoll, ilkoll tgħammidna fi Spirtu wieħed biex nagħmlu ġisem wieħed, sew Lhud sew Griegi, sew ilsiera sew ħielsa, u lkoll xrobna minn Spirtu wieħed” (2 Kor 7:13).
Bħalma Kristu, bil-mewt u l-qawmien tiegħu, uriena li huwa rebaħ saħansitra fuq il-mewt, hekk ukoll il-magħmudija hija ta’ kuraġġ kbir għalina għax permezz tal-qawwa li nirċievu mill-Ispirtu s-Santu kapaċi negħlbu it-tentazzjonijiet tad-dnub. San Pawl jgħidilna, Ma tafux li aħna li tgħammidna fi Kristu, tgħammidna fil-mewt tiegħu? (Rum 6:3).
Huwa f’Ġesu’ innifsu li nirċievu l-Ispirtu s-Santu; il-preżenza tal-Ispirtu s-Santu mhux talli mhijiex miċħuda imma nirċevuha permezz ta’ Ġesu’ stess. San Ġwann il-Battista jgħid fil-predikazzjoni tiegħu jgħid li huwa jgħammed bl-ilma, imma min ġej warajh – qiegħed jirrieferi għall-Ġesu’, jgħammidkhom bl-Ispirtu s-Santu u n-nar (Mt 3, 11).
Fakkarna iżda Mulej, li l-Grazzja li hija l-qawwa sopranaturali tas-sagrament, ma tingħatax b’mod mekkaniku jew b’mod maġiku. Huwa minnu li s-sagramenti jġibu l-grazzja ex operere operato jiġifieri direttament mingħand Kristu. Iżda sakemm nistgħu, fil-limitazzjonijiet tagħna, rridu nagħmlu l-parti tagħna biex nikbru fil-Fidi.
Mulej qaddis, Ħallieq u Alla nirringrazjawk li żejjintna b’ħafna grazzji u tgħin lil kull min jitolbok.
Nitolbuk biex tagħtina fidi sħiħa sabiex nesperjenzaw l-imħabba tiegħek.
Glorja lill-Missier Mulej, Alla tagħna ikollok ħniena minna.
Ġesu’ Kristu, Alla u redentur tagħna, int li kkonvertejt tant midinba, fejjaqt tant uġiegħ agħmel li nżommu ruħna kemm jista’ jkun bogħod mid-dnub.
Glorja lill-Missier Mulej, Alla tagħna ikollok ħniena minna.
Int Marija li għint biex sabbart u serraħt tant qlub muġugħa, Int li bid-dulur tiegħek tinkoraġġina fl-aktar mument diffiċli.
Ibqa’ magħna.
Meta nerfgħu is-salib tal-ħajja m’aħniex weħidna.
Hemm Kristu magħna. Ġesu’ dejjem se jgħin ill-batut.
Glorja lill-Missier Mulej, Alla tagħna ikollok ħniena minna.
Oh Trinita’ Mqaddsa, Il-Missier, l-Iben U l-Ispirtu s-Santu li qlajtu tant grazzji u tisimgħu it-talb tagħna
agħtuni l-qawwa li tant għandi bżonn.
